Господи Иисусе Христе Боже наш, упование всем концемъ земли, и сущимъ на мори далече, пронарекий святыя дни сия постныя закономъ и пророки, образъ намъ покаяния и страстемъ умерщвления предлагая: Самъ же Собою въ исполнении времен, плотию на земли явися, сия възаконил и освятил еси, четырдесятъ дни и нощи, постився: яко Щедр и Милостив, благоволи всемъ намъ въ покаянии съвершенном, въ смерении нелицемерномъ, въ молитвахъ прилежныхъ, въ алчбе и жажде, въ коленномъ частом преклонении, и в сердце сокрушенномъ святыя дни сия начати, и безпорока въ чистой совести течение ихъ совершити, веру неразлучную съблюсти, и победителемъ греха явитися. Ангела же мирна пристави животу нашему съблюдати входы и исходы нашя неврежденны и неприткновенны от всех вражиих наветовъ и обстояний, наставляя же насъ къ деланию всехъ добродетелей, на подвиги же постныя силою твоею укрепляя, къ воздержанию страстемъ, и къ очищению душамъ и телом, яко да сподобимся неосужденно причаститися Пречистому Телу, и Честной и Животворящей Твоей Крови. Ты бо еси Бог милостий и щедрот и человеколюбия, и хотяй всем спастися: и Тебе славу возсылаемъ Събезначальнымъ Ти Отцем, и съ Пресвятымъ, и Благимъ, и Животворящимъ Ти Духом, иныне и присно, въ веки вековъ. Аминь.
(Требник Петра Могилы 1646 г.)